އެމެރިކާގެ ޑިފެންސް އިންޓެލިޖެންސް އެޖެންސީ (ޑީ.އައި.އޭ) އިން އިސްރާއީލުގެ ޖާސޫސީ ނުރައްކަލާ ގުޅޭ އެސެސްމަންޓް އެންމެ މަތީ "ކްރިޓިކަލް" ލެވެލްއަށް އުފުލާފައިވާ ކަމަށް އެމެރިކާގެ އިސް އޮފިޝަލުން ހާމަކޮށްފިއެވެ.
މި ނިންމުމަކީ އީރާނާ ދެކޮޅަށް ކުރެވޭ ހަނގުރާމައާއި ސުލްހައިގެ މަޝްވަރާތަކާ ގުޅިގެން، އެމެރިކާގެ އިސް އޮފިޝަލުންނަށް އަމާޒުކޮށް އިސްރާއީލުން ހިންގާ ޖާސޫސީ ހަރަކާތްތައް އިތުރުވެ، ފާޅުކަން ބޮޑު ގޮތެއްގައި އެމެރިކާގެ ދާހިލީ ކަންކަމަށް ނުފޫޒު ފޯރުވަން މަސައްކަތް ކުރާތީ ނިންމި ނިންމުމެކެވެ.
ޑީ.އައި.އޭ އިން އެކުލަވައިލި ހަތް ސަފުހާގެ ރިޕޯޓެއްގައި ފާހަގަކޮށްފައިވާ ގޮތުގައި، އިސްރާއީލުން ވަނީ އިންސާނީ ވަސީލަތްތަކާއި ޓެކްނޮލޮޖީ ބޭނުންކޮށްގެން ޖާސޫސީ މައުލޫމާތު އެއްކުރުމުގެ ގާބިލުކަން ވަރަށް ބޮޑަށް އިތުރުކޮށްފައެވެ.
މީގެ ތެރޭގައި ވައިޓް ހައުސްގެ ސިއްރު މަޝްވަރާތައް އަޑުއެހުމާއި، ރައީސް ޓްރަމްޕްގެ އީރާނާ ބެހޭ މަންދޫބު ސްޓީވް ވިޓްކޮފްގެ އިތުރުން ޕެންޓަގަންގެ އިސް އޮފިޝަލުން ކަމަށްވާ އެލްބްރިޖް ކޯލްބީ އަދި މައިކަލް ޑިމީނޯގެ މުއާސަލާތީ މައުލޫމާތުތައް ވަގަށް ނެގުން ހިމެނެއެވެ.
މި ނުރައްކަލުގެ ދަރަޖަ މަތިކޮށްފައިވަނީ އެމެރިކާއާއި އިސްރާއީލާ ދެމެދު އޮތް ގުޅުން ވަރަށް ބޮޑަށް ގޯސްވެފައިވާ ދަނޑިވަޅެއްގައެވެ. އީރާނާއި ލުބުނާނާ ގުޅޭގޮތުން އެމެރިކާއިން ގެންގުޅޭ ސިޔާސަތުތައް ބަދަލުކުރުމަށް އިސްރާއީލުން ވަރަށް ބޮޑަށް މަސައްކަތް ކުރަމުންދާ ކަމަށް އެމެރިކާގެ އޮފިޝަލުން ވިދާޅުވެއެވެ.
މި ރިޕޯޓުތަކާ ގުޅިގެން ވައިޓް ހައުސްއާއި އިސްރާއީލުގެ އޮފިޝަލުން ވަނީ އެކަން ދޮގުކޮށް، ދެ ގައުމުގެ ދެމެދުގައި އޮތް އަސްކަރީ އަދި ސިޔާސީ ގުޅުން ވަރުގަދަ ކަމަށް ބުނެފައެވެ.
