ގަތަރުގެ ކުރީގެ އަމީރު، ޝެއިހް ހަމަދު ބިން ހަލީފާ އަލް ސާނީ އަވަހާރަވުމާއި ގުޅިގެން ރައީސް، ޑރ. މުހައްމަދު މުއިއްޒު ތައުޒިޔާ ދަންނަވައިފިއެވެ.
އެމަނިކުފާނު އަވަހަރާވިއިރު، އުމުރުފުޅަކީ 74 އަހަރެވެ.
ގަތަރުގެ އެންމެ އިސްވެރިޔާ އަމީރުގެ ރަސްމީ އޮފީސް، އަމީރީ ދިވާން ނެރުއްވި ބަޔާނެއްގައި ވިދާޅުވީ، އެމަނިކުފާނު އަވަހަރާވެފައި ވަނީ މިއަދު ހެނދުނުގެ ވަގުތެއްގައި ކަމަށެވެ.
އެމަނިކުފާނު އަވަހާރަވުމާއި ގުޅިގެން ތައުޒިޔާ ދަންނަވައި "އެކްސް"ގައި ކުރި ޕޯސްޓެއްގައި ރައީސް ވިދާޅުވީ، ގަތަރުގެ ތަރައްގީއާއި ކުރިއެރުމަށް ބޮޑު ދައުރެއް އަދާކުރި ހަމަދު ބިން ޚަލީފާ އަލް ސާނީ އަވަހާރަވުމުން ހިތާމަ ކުރާ ކަމަށެވެ.
Deeply saddened by the passing of His Highness Amir Sheikh Hamad bin Khalifa Al -Thani, former Amir of the State of Qatar, whose visionary leadership contributed significantly to the development and progress of the State of Qatar.
I extend my heartfelt condolences to His…
— Dr Mohamed Muizzu (@MMuizzu) July 12, 2026
ޝެއިޚް ހަމަދު އަވަހާރަވުމާއި ގުޅިގެން ރައީސް ވަނީ އެމަނިކުފާނުގެ ދަރިކަލުން ގަތަރުގެ އަމީރު، ޝައިކް ތަމީމް ބިން ހަމަދު އަލް ސާނީއަށާއި ޝާހީ އާއިލާއާއި އެގައުމުގެ ސަރުކާރުގެ އިތުރުން ރައްޔިތުންނަށް ތައުޒިޔާ ދަންނަވާފައެވެ.
"އަލްމަރުހޫމް ޝައިޚް ހަމަދު ބިން ހަލީފާ އަލް ސާނީއަށް ޖަންނަތުލް ފިރުދައުސްގެ އެންމެ މަތީ ދަރަޖަ ދެއްވައި، ރަހުމަތް ލައްވާށީ" ރައީސްގެ ތައުޒިޔާ މެސެޖުގައި ވިދާޅުވިއެވެ.
މިއަދު އަވަހާރަވި ޝެއިޚް ހަމަދަކީ ގަތަރުގައި 1995 ވަނަ އަހަރުން ފެށިގެން 2013 ވަނަ އަރަހަށް ވެރިކަން ކުރެއްވި، އެގައުމު ޒަމާނީ ފެންވަރަށް ބިނާ ކުރުމުގެ އެންމެ އިސް ދައުރެއް އަދާ ކުރި މޭސްތިރިޔާއެވެ.
